Daga Umar Sani Yakubu
Wani jigo na jam’iyyar All Progressives Congress (APC) a Jihar Bauchi, Kwamared Sabo Muhammad, ya bayyana a ranar Laraba cewa jam’iyyar People’s Democratic Party (PDP) ta rasa tsarin siyasa da shugabanci a jihar.
Yayin wani taron taya shi murna da kungiyar Shehu Buba Vanguard (SBU) ta shiry Sabo Muhammad ya ce duk da irin nuna karfi da PDP ke yi, APC za ta kwace mulki daga hannun jam’iyyar a zaben 2027 mai zuwa.
Ya danganta rashin tsari a PDP da rashin samun sahihin dan takara da zai iya gogayya da wadanda APC ke da su. A cewarsa, “PDP ta rasa shugabanci saboda rashin dan takara nagari da zai iya tsayawa kafada da kafada da ‘yan takararmu.”
Jigon na APC ya jaddada muhimmancin hadin kai da jituwa a cikin jam’iyyar APC, yana mai cewa jam’iyyar na da dan takara nagari wanda ya san halin da jihar ke ciki.
Ya bayyana yadda APC ke amfani da duk wata dama da shaidu da take da su domin tabbatar da nasara a zaben shekarar 2027.
Sabo Muhammad, wanda aka nada a matsayin mai taimakawa sanata mai wakiltar Bauchi ta Kudu kan sadarwa, ya ce an riga an tanadi tsari na yada labarai da zai tallata dan takarar jam’iyyar tare da samar da daidaito da hadin kai a harkar yakin neman zabe.
Ya jaddada bukatar hadin gwiwa da fahimta tsakanin ‘ya’yan jam’iyyar domin cimma burinsu.
A nasa bangaren, Darakta Janar na kungiyar Shehu Buba Vanguard, Ishaq Dabo, ya bayyana cewa taron na musamman ne domin taya Kwamared Sabo Muhammad murna bisa nadin sa a matsayin mai taimakawa Sanata Shehu Buba Umar kan harkokin yada labarai.
Haka kuma, ya bayyana aniyar Sanata Shehu Buba na tsayawa takarar gwamna a zaben shekarar 2027, yana mai cewa shi ne dan takarar da ya dace da jam’iyyar APC a jihar.
Ishaq ya ce irin tasirin da Sanatan ke da shi da ayyukan da ya gudanar ya tabbatar da cancantarsa da dacewarsa da wannan mukami.
A cewarsa: “Ya samar da ayyukan yi ga matasa, ya tallafa wa matasa da kayan sana’a. Ya gyara da kuma gina makarantun firamare da cibiyoyin kiwon lafiya. Kuma a karo na farko a Bauchi, ya kawo titin kwalta.”
Ya jaddada cewa Shehu Buba shi ne cikakken dan takara da za a iya tallatawa ga jama’ar jihar.
Wakilinmu ya tattaro cewa Shehu Buba Vanguard (SBU) kungiya ce da aka kafa domin tallafa wa burin Sanata Shehu Buba na tsayawa takarar gwamnan Jihar Bauchi a zaben 2027.